海鮮晚餐: 咖哩炒肉蟹配牛油法包，椒鹽瀨尿蝦 (光波爐)

因我另一半星期六買了法包, 所以決定星期日煮咖哩. 佢話要食咖哩炒蟹, 我哋出去番北河街街市上次買肉蟹個檔, 今次阿姐幫我哋選隻蟹都冇令我哋失望, 仲畀我哋見到佢哋有瀨尿蝦賣, 又買咗半斤! 呵呵!!!


咖哩炒肉蟹配牛油法包 (二人份量)


材料:

肉蟹1隻

洋蔥1個 (切片)

唐芹1棵 (切段)

利X椰子咖哩汁1罐

花奶1罐(小)

蛋2隻

指天椒1隻 (如唔想太辣, 可以唔落)

調味:

糖3茶匙
魚露1茶匙


做法:

1. 肉蟹切件, 洗淨抹乾後撲上薄生粉, 然後半煎炸至熟起鑊, 瀝乾多餘油份備用.
2. 燒熱兩湯匙油, 落洋蔥爆香, 蟹回鑊兜炒.
3. 落咖哩汁, 待咖哩汁滾起落魚露同糖, 落唐芹同指天椒, 再下花奶兜勻至滾起.
4. 落蛋汁, 快兜直至蛋開始凝固立即熄火, 
即可上碟.

從未下廚煮椒鹽瀨尿蝦, 因怕做油炸嘅步驟. 自從有了光波爐, 就可以整熟同乾身, 免油炸.因為初次用光波爐整加上有蟹嘅關係, 所以買咗半斤試驗吓!
椒鹽瀨尿蝦 (光波爐) 
材料:

瀨尿蝦半斤
指天椒2隻 (切粒)
蒜頭2-3粒 (刴蓉)
椒鹽1茶匙
做法:

1. 瀨尿蝦以清水洗淨，瀝乾水份.
2. 光波爐首先250度20分鐘預熱, 然後將瀨尿蝦分數次平均放在低架上, 用205度-210度;
    8分鐘.

3.

將瀨尿蝦反轉再以200度; 2分鐘即成.

4. 燒熱兩湯匙油, 爆香

蒜蓉及指天椒, 聞到香味將瀨尿蝦回穫，灑上椒鹽炒勻即上碟.

滋味晚餐: 薑蔥炒肉蟹，京蔥香芹浸花甲，仲有紅磡生記嘅滷味!

琴日因我另一半+ 我都想食蟹, 咁我另一半係因出深水埗而係北河街街市買咗隻肉蟹! 跟住因我下晝同屋企人一齊, 途經係紅磡, 我就係紅磡銜街市買花甲同出名滷味好正嘅生記買咗2隻鵝翼, 1舊鵝翼同2舊滷水豆腐 (仲送多1舊鵝翼), 好味到yummy yummy!!!



薑蔥炒肉蟹 (二人份量)

材料：
肉蟹1隻
薑3 - 5大片 (，因為我勁鍾意食薑)
蔥3棵（我緊係落勁多啦, 細個阿媽話食多啲蔥聰明啲呀!)
酒1湯匙

調味：

蠔油2湯匙
生抽1湯匙
糖2茶匙
水2 湯匙
(記住上碟前自己試下味啦)

做法:

1. 蟹洗淨切件, 瀝乾水份, 撲上生粉以半煎炸兜炒至熟 (屋企煮可以以半煎炸, 唔洗泡油),  起鑊, 瀝乾多餘油份.

2. 燒熱2湯匙油, 落薑+1半份量蔥爆香, 將蟹回穫兜炒一陣, 下酒, 再快兜炒.

3. 落芡汁兜勻, 再放埋剩餘嘅蔥, 蓋上鑊蓋, 焗1 - 2分鐘. 試味, 便可上碟.

京蔥香芹浸花甲 (二人份量)

材料:

花甲 1斤
蒜頭 2 - 3粒 (切半)
香芹2棵 (切段)
京蔥1棵(切段)
草菇5 - 6 粒 (切半) (因我鍾意食草菇, 所以加上. 如唔喜歡可以唔加)

調味：
雞粉/ 鹽1 茶匙
(如用清雞湯, 可以唔洗調味)

做法:

1. 花甲洗淨, 用鹽水浸最少半日

2. 先用少少油爆香蒜片, 京蔥

2. 加入花甲兜炒一會，再加入水 / 清雞湯, 落調味, 之後落草菇

3. 煮至花甲開蓋就成, 最後放香芹, 試味, 就可以上碟啦﹗

紅磡生記滷味

繼續光波餐 - 英式煙肉焗薯蓉

琴晚繼續都係光波餐~~~~~

英式煙肉焗薯蓉

材料 : 
美國焗薯2 - 3 個
牛油  25g
牛奶  1/2 盒 (細包裝)
鹽   1/2茶匙
煙肉3片
芝士粉少許

做法 :  
1. 用煲煲一煲滾水 (水要浸過薯仔)
2.  水滾後放焗薯, 收中火煲30分鐘
3.  煙肉煎香切粒
4.  焗薯煲焾後去皮, 放大碗高速搞爛
5.  加入牛油,鹽及牛奶一起拌勻
6.  跟住放煙肉及芝士粉再拌勻
7.  把調味好的薯蓉放入焗盤
8.  光波爐預熱250度; 5分鐘
9.  將薯蓉放入光波爐250度; 20分鐘便成

芝士火腿麥多士 (光波爐)

發現自己原來好耐冇寫blog, 自從有咗光波爐同喜歡煮嘢食, 希望可以再有動力寫blog啦!!!

今日係光波餐, 由下午茶開始:

火腿芝士麥多士

材料：

麥方包 2片
芝士 2片
三文治火腿 2片

做法：

1.首先預熱光波爐 110度 3分鐘
2. 將火腿與芝士梅花間竹放在兩片包入, 然後一開二.
3. 放上烘盤再調教光波爐 110度 7分鐘
4. 反轉多士 180度 2分鐘即成.

食後感:

雖然可以做到多士半溶, 但略微多士唔夠脆, 下次再做嘅時候, 會將第一次焗嘅度數高少許, 時間加多1-2分鐘, 睇吓如何!!!