2014年5月12日 星期一

金銀菜豬肺湯

琴日母親節,每年這個日子,我都會送上鮮花。因為媽咪係愛花之人,反而佢唔嗜甜,所以我唔需要為做什麼甜品而苦惱。今年送上媽媽喜愛的百合花,令她驚喜萬分。這些百合花開得好燦爛,希望媽媽身體健康,日日都咁開心!

每年都會提早同媽媽,婆婆們出去食飯,今年如是。反而,琴日在家和媽咪慶祝,一早同媽咪飲茶,之後我獨自去一田買餸。記得上星期行一田,見到有已經洗淨嘅豬肺賣。小時候,媽咪每次都會好辛苦洗豬肺去煲湯畀我哋兩姊弟飲,所以今年調轉角色,由我去煲畀佢飲!





金銀菜豬肺湯 (4人份量)

材料:

豬肺 一個
白菜乾 二兩 (大約兩扎)
大白菜 一斤
豬筒骨 半斤
南北杏 四錢
薑片 四片
蜜棗 四粒


做法:

1. 豬肺洗淨,切件,用粗鹽摔,沖水,之後白鑊烘乾,使豬肺出水縮小。
2. 豬筒骨洗淨,汆水,備用。
3. 白菜浸水洗淨,菜乾浸水去沙,洗淨切尾部。
4. 南北杏、蜜棗浸水洗淨,備用。
5. 凍水放薑,煲滾10-12碗水,放下所有材料(豬肺除外),大火煲半小時,再轉小火煲半小時。之後下豬肺,再煲1個半小時,之後轉大火加適量鹽調味,即成。

功效: 

此湯水,不只潤燥治熱咳、燥咳,還可調節胃腸陰傷燥熱諸疾。如能多飲幾次,更可潤膚、止癢、通便。

白菜與菜乾同用,有清熱潤燥特效。
南、北杏同用,亦有潤肺治咳之功。
蜜棗中和潤燥。
豬肺補肺氣而加強肺的功能。

資料來源:醫食拾遺


**小小貼士**

1.豬肺可以在肉檔購買時,請肉檔代為灌洗。

2.把豬肺切大件,開小至中火,放入白镬略煎,慢慢加熱,使豬肺出水縮小。把水倒去繼續煎至豬肺體積變少,而不太出水,取出豬肺才可用來煲湯。

8 則留言:

**謝謝到訪及留言** cici會盡快閱讀及回覆大家嘅留言 :) 如果想以電郵收到留言回覆, 請按留言方框下的{通知我}.

  1. 回覆
    1. Sam, 係呀! 我只係係一田見到有買喎,唔知仲有邊度有得買呢?

      刪除
  2. 我都想煲呀...鬼佬食煙個肺唔多好成日咳。
    原來落咗豬肺都仲要落豬骨嫁? 唔夠味?
    豬肺係咪一定唔可以一齊落嫁? 一定要後下嫁?

    回覆刪除
    回覆
    1. 吸血鬼,加咗豬骨湯會濃味好多。如果想啲豬肺好腍就同時間落,但如果想有咬口,就遲啲落!

      刪除
  3. 哈~cici 你好有心機~我就好怕搞豬肺~有排洗呀~~~

    回覆刪除
    回覆
    1. 黃師奶,多謝讚賞! 我只係買已經灌洗的豬肺,冇咁煩!

      刪除
  4. CiCi, 真係乖女孝順又叻女!整豬肺湯真係唔容易,所以每次家人煲親都要飲多幾碗。

    回覆刪除
    回覆
    1. 小高,洗豬肺其實畀我想像中冇咁煩,因為已經免卻灌洗程序。下次我都好樂意再煲過

      刪除