白汁粟米煙肉貝殼粉

世界盃已經進行到中段，但我已經係中段止步。因為繼甩咗第一隻牙 (西班牙)，第二隻牙 (葡萄牙)琴晚一役都已經出局，所以餘下來的比賽，可以唔洗睇，有覺好瞓囉!

白汁當然先製最好，但我哋上班一族，難免要開OT。有時放工已經夜，十分疲倦，當然想快；靚；正就有飯開。只要雪櫃有白汁磚，用簡單的食材，就可以係15分鐘有美味的意粉食。

白汁粟米煙肉貝殼粉 (2人份量)


材料:

新鮮粟米 1條
煙肉 3片
洋蔥 半個
貝殼粉 200克

白汁材料:

白汁磚 2格
牛奶 100ml
芝士 1塊


調味:

鹽 少許
胡椒粉 少許


做法:


1. 煙肉切小粒；洋蔥切小粒，新鮮粟米拆粒，備用。

2. 煲滾水, 加鹽，下具殼粉煮包裝袋上指示之時間 (減2分鐘)，約4分鐘，盛起過冷河。瀝乾水後，加少許橄欖油拌勻。

3. 用少許橄欖油起镬，爆香洋蔥、煙肉，下粟米粒，放入調味炒至熟透，將貝殼粉回鑊快炒。

4. 最後，先加入白汁磚，跟著倒入牛奶, 直至白汁磚溶化, 後加入芝士兜勻，即成。