涼拌青瓜花甲

真正踏入秋季，早晚比較清涼，感覺十分舒服，但午間時份依然比較熱，所以大家一定要有充足裝備，應當保重自己身體，以免著涼。

襯天氣還有點熱，食涼拌最能令自己感覺清新。相信大家都食過涼拌青瓜，但涼拌花甲，大家又試過未呢？這個餸是在太子一間舊式酒家(珠江酒家)食過，味道帶微辣，又不失花甲的鮮甜。花甲，除了蒸、煮、炒，還可以涼拌。

涼拌青瓜花甲 (2-3人份量)

材料：

青瓜 2條
花甲 1斤
鹽 少許
指天椒 適量(切粒)

調味汁料：

蒜蓉 2湯匙
生抽 1茶匙
糖 2茶匙
鎮江醋 2茶匙
豆瓣醬 1 1/2湯匙
麻油 1茶匙

做法：

1. 青瓜洗淨，用食用水沖洗乾淨。

2. 將青瓜一開四切開，刮去籽，再切段；用刀背略拍青瓜數次。

3. 青瓜放入大碗，加入少許鹽醃1小時至出水，倒去水後將青瓜用飲用水沖水，用廚房紙輕輕印乾水份。

4. 花甲用鹽水浸約半小時, 洗淨, 用沸水將花甲, 煮至開殼, 即撈起。

5. 將青瓜、花甲及已調勻的醬料放入保鮮袋內，加入指天椒。

6. 拌勻後，放進雪櫃泡醃2小時或以上，即可食用。

**小小貼士**

-如不嗜辣，可以免除指天椒或將豆瓣醬份量減少
-汁料酸辣份量可自行調較。