2016年2月6日 星期六

賀年糕品記錄: cici馬蹄糕 2016





年二八洗邋遢,這天你哋有冇買碌柚葉的習慣呢?我有的。習俗稱,碌柚葉將這年霉氣全部掃走,希望新一年事事順利! 在此,cici祝福大家猴年如意,事事順利 !

繼續賀年第三糕,今年繼續為我的親朋好友做馬蹄糕。集合去年她們給的意見和想馬蹄糕更彈牙,質感再好一些。我將去年馬蹄糕的材料和做法,稍微修改。


馬蹄糕


材料: 

馬蹄粉 500克



木薯粉 (泰國生粉) 100克


新鮮馬蹄肉 2斤半 (連皮馬蹄)
冰糖和黃糖 500克 (各250克)
菜油 1茶匙
水 2750毫升 (分開1000毫升及1750毫升兩份)

[此份量約可做四底正方形模(5”x5”)兩底長方形模(4"x8")]


做法: 

1.將馬蹄粉及木薯粉混合,用1000毫升水攪勻成馬蹄粉漿,過篩兩次備用。



2.馬蹄肉去皮,切片再切碎,備用。


3.將冰糖、片糖和菜油放入煲內加1750毫升水慢火煮溶。


4.跟著繼續用慢火,將半份馬蹄粉漿慢慢加入糖水內,快速攪勻。



5. 餘下的粉漿分3-4次加入,每次煮約3分鐘。倒入最後一次粉漿,再煮約2分鐘後,熄火。

6. 最後將馬蹄碎加入馬碲粉漿內攪勻。



7.然後將適當份量倒入模具內(如用鋼盆請掃上少許菜油),用保鮮紙貼著粉漿蓋住。



8. 水滾後以大火蒸約35分鐘,蒸好撕去保鮮紙,放涼後放入雪櫃保存,即成。


**小小貼士**

- 要選用新鮮馬蹄,不要選用已去皮或真空包裝的馬蹄。

- 加入菜油令馬蹄糕質感更好。 

- 一定要用慢火煮糖水才加入半分馬蹄粉漿,因為溫度太高會影響製成品的幼滑度,令其起粒,及分數次加入馬蹄粉漿,才能做出彈牙馬蹄糕。

- 蒸馬蹄糕時蓋上一層保鮮紙,並將保鮮紙貼著馬蹄粉漿,這樣便可以避免在蒸糕的過程中蒸氣水分滴在馬蹄糕上,這樣蒸出來的馬蹄糕才滑溜溜。

- 將切好的馬蹄糕上樸上一層薄薄的生粉才煎,這樣煎出來的馬蹄糕便更香脆可口了。



13 則留言:

**謝謝到訪及留言** cici會盡快閱讀及回覆大家嘅留言 :) 如果想以電郵收到留言回覆, 請按留言方框下的{通知我}.

  1. 呢個我就唔會整 lu,一來馬蹄粉賣到咁貴,我覺得唔多值,二來最怕批馬蹄皮,咁多馬蹄真係批到眼毛長都未攪得掂!

    回覆刪除
    回覆
    1. cici,恭喜發財,新年快樂!!祝 您身體健康,生活愉快,事事順利!

      刪除
    2. 我都係整畀屋企人同朋友,自己都唔食嘅。不過,今年真係覺得有啲唔係好值。馬蹄粉好貴呀

      刪除
    3. 其實我以前都好想整馬蹄糕,但當發現馬蹄粉係咁貴時我就即刻打消念頭 lu!!

      刪除
    4. Kestrel, 下年真係要諗吓仲整唔整囉

      刪除
  2. 回覆
    1. EE,今次馬蹄買得抵。我買2斤,相熟菜檔話怕馬蹄有啲會爛,送多半斤畀,開心死

      刪除
  3. 恭喜發財! 身體健康! 猴年行好運! :)

    回覆刪除
    回覆
    1. Kwan, 祝你身體健康,心想事成,事事順利!

      刪除
  4. 回覆
    1. Samwei,祝你猴年大吉,心想事成,身體健康!

      刪除
  5. 雀后祝大家:心想事成、身體健康、萬事如意、步步高陞、笑口常開、財源滾滾、新年快樂呀!

    回覆刪除
    回覆
    1. 雀后,祝你猴年行大運,身體健康,心想事成,合家平安,生活愉快!

      刪除