2021年2月3日 星期三

Cici賀年小食2021: 【三色奶棗】

距離農曆新年仲有1星期,大家係咪都開始忙於整賀年食品呢?疫情下,雖然大家可能會減少出外拜年,但都會為家人親戚準備賀年食品 



近期大熱網紅賀年小食【四色奶棗】,加上見到朱Sir都出咗條教學片,令到一個唔鍾意食棗嘅人,都為之心動。 正所謂「心動不如行動」,屋企除咗棉花糖,所有材料都已經齊備 (連鋼飲管都有) ,咁無理由唔整呀 

今次弄【三色奶棗】有咸有甜,一次過滿足大家嘅喜好,口感奶香濃郁,一口接著一口,完全停不了口 

【三色奶棗】

材料:

新彊紅棗 39粒
原粒杏仁 39粒
棉花糖 150克
無鹽牛油 24克
芝士味: 奶粉 8克 芝士粉 4克 (各準備2份) 
抹茶味: 奶粉 8克 抹茶粉 4克 (各準備2份) 
朱古力味: 奶粉 8克 可可粉 4克 (各準備2份) 




做法: 

1. 紅棗略為清洗,瀝乾水份,用不銹鋼飲管去棗核,備用。



2.杏仁放入焗爐用150°C;10分鐘,放涼,備用。



3. 將杏仁塞入無核紅棗裡,備用。



4. 把三色粉各自混合,備用。



5. 將8克無鹽牛油放入不沾鍋中,用小火加熱至融化。



6. 倒入50克棉花糖,小火拌煮至融化,加入已混合的奶粉+芝士粉拌勻,再加入紅棗 (13粒) ,快速攪拌均勻,熄火。





7. 用手將每粒紅棗取出,再塑形,包著薄薄一層棉花糖,再放入已混合的奶粉+芝士粉沾上外層,即成。



8. 其他口味重複步驟 5-7,即成。




**小小貼士**

-紅棗建議用新彊紅棗,比較大粒飽滿。
-去棗核用不銹鋼飲管只需篤一邊紅棗篤到一半,之後篤另一邊紅棗再推就好容易去棗核。
-建議選擇細size的棉花糖,較易融化
-味道隨個人喜好,多少按自己喜歡的深淺度隨意。
-為免味粉加入棉花糖會攪得唔均勻,建議預先把味粉混合
-棉花糖包裹紅棗至不沾鍋乾身,就可以熄火,襯溫度微暖取出就唔會黏手

2 則留言:

**謝謝到訪及留言** cici會盡快閱讀及回覆大家嘅留言 :) 如果想以電郵收到留言回覆, 請按留言方框下的{通知我}.